Wednesday, August 10, 2022
All the latest schoolboy rugby news, results and stats


Wildeklawer 2014 het ‘n krieketgeur

By Hannes Nienaber , in News , at 28 April 2014

DAAR sal vanjaar heelwat meer krieket langs die hoofrugbyveld van die Hoërskool Diamantveld tydens die sesde Wildeklawer-rugbytoernooi as tydens die vorige toernooie gepraat word.

Verskeie spelers wat in aksie sal wees tydens die toernooi is begaafde krieketspelers. Soos byvoorbeeld Waterkloof se binnesenter, Janneman Malan het verlede jaar ‘n ongelooflike onoorwonne 214 lopies op Krieket Suid-Afrika (KSA) se nasionale o.17-week teen Grens gemoker. Albei sy broers, André en Pieter Malan speel eersterangse krieket.

Boonop is een van Suid-Afrika se mees talentvolste krieketspelers in sy geskiedenis, Herschelle Gibbs se seun Rashard Fuller in King Edward VII (KES) se span ingesluit. Fuller draf op heelagter en losskakel uit. Sy pa was in 1992 die SA Skole-span se losskakel.

Morgan Steyn (Selborne-kollege, losskakel), Niel Stannard (Grey-kollege, vleuel) en Rikus Zwart (Noord-Kaap, slot) het almal al hulle onderskeie provinsies op KSA se nasionale weke verteenwoordig. Een van Noord-Kaap se afrigters, Zandré Swarts speel krieket vir Griekwas se provinsiale span.

Die Springbok-breier, Heynecke Meyer se seun Vic sal aan die kant van Affies se skrum sak. Die voormalige Springbok-vleuel en Vrystaatse legende, Chris Badenhorst se seun Dian sal op skrumskakel vir Grey-kollege in aksie wees. Grey se heelagter Henry Immelman se broer Nicolaas speel vir die Vrystaat in die Vodacombeker-reeks. Die span se senter Julian Jordaan is die neef van Paul Jordaan wat in dieselfde posisie vir die Sharks in die Superugby-reeks speel.

In die gasheer se span sal Hawies “Dagga” Bosman se seun Nardus die span van flank af aanvoer. Maritzburg-kollege se heelagter, Matthew Kriel is die jongste broer van die Kriel-tweeling, Jesse en Dan wat in die Suid-Afrikaanse o.20-span vir die komende wêreldkampioenskap vir o.20-spanne in Nieu-Seeland ingesluit is.

Die voormalige Griekwa-afrigter en speler, Abré Minnie se seun Derrick sal die oond vir sy pa se alma mater Hoërskool Outeniqua skoonmaak. Minnie sr. is ook die Kwaggas se tegniese adviseur en sal sonder twyfel die span se wedstryd Maandag teen Grey op televisie dophou indien hy nie saam met die span na die Diamantstad reis nie.

Die voormalige Springbok-senter, Brendan Venter is in dieselfde posisie as Minnie by Paul Roos betrokke. Hy behoort ook sy waarnemings aan die span van Stellenbosch na die eerste wedstryd teen KES deur te gee. Die span van die Eikestad se een afrigter is die voormalige Springbok, Dawie Snyman.

Ander afrigters met eersterangse ondervinding as spelers is Wessel du Plessis, Tewis de Bruyn (albei Grey), Jean Stemmet, Bok Markram (albei Diamantveld), Rudi Dames (Glenwood) en Ryan Strudwick (Maritzburg-kollege).

 

Comments


Leave a Reply


error: Content is protected !!