Sunday, June 26, 2022
All the latest schoolboy rugby news, results and stats


Welkom Gim kan vandag posisie in Griffon-liga versterk

By Hannes Nienaber , in News , at 9 May 2015

In die Noord-Vrystaat sal die rugbyspan van Welkom-Gimnasium vandag in die tweede ronde van die Griffon-liga op sy tuisveld teen Voortrekker van Bethlehem sy plek bo-aan die puntelys wil verstewig.

Gimmies het reeds in die eerste ronde ’n goeie sege behaal deur Witteberg in Bethlehem met 20-12 te troef.

’n Sege oor die Trekkers sal die span van Welkom in ’n stewige posisie plaas om bo-aan die puntelys aan die einde van die rondomtalie-afdeling van dié liga te eindig.

Gimmies se twee breiers, Roean Bezuidenhout en Jacques Juries, sal sonder die dienste van hul senter, Richman Gora, moet klaarkom. Gora het ’n oog vir ’n gaping en sy afwesigheid sal gewis ’n leemte laat.

Die span word egter versterk deur die heelagter, Ezrick Alexander, en die kantman Byron Ferreira, wat die span se nederlaag van 42-23 teen Queen’s College misgeloop het.

Die Afrikaanse Hoërskool Kroonstad pak Hentie Cilliers op sy tuisveld in nog ’n belangrike wedstryd in dié liga.

Agterlangs sal Henties die skrumskakel, Duncan Horak, en heelagter, Dylan Stiemmie, moet dophou.

Voorlangs kan die slotpaar van Ettienne O’Donovan en Michiel Bosman vir die besoekers probleme besorg.

Die span van Virginia se losskakel, Dominic Smit, kan enige wedstryd op sy kop swaai en Rooiskool sal gewis ’n paar planne hê om hom hok te slaan.

In die Sandveld- en Oos-Vrystaatse ligas is verskeie wedstryde uitgestel weens die feit dat baie van die land se universiteite vandag hul ope dae het.

Wilgerivier van Frankfort sal wel op sy tuisveld teen Reitz wil vergoed ná sy nederlaag van 23-19 teen Harrismith. Dit was sy eerste nederlaag in die Oos-Vrystaat sedert 2010.

Hennenman sal wil wys dat sy eerste sege oor Bothaville in drie jaar vroeër in die seisoen nie ’n vloekskoot was nie.

Bepalings

Vandag se bepalings is (tuisspanne eerste genoem):
10:00: Wilgerivier t. Reitz;

10:30: AHS Kroonstad t. Hentie Cilliers;

11:30: Riebeeckstad t. Wessel Maree;

11:40: Ficksburg t. Harrismith;

12:00: Hennenman t. Bothaville;

12:00: Goudveld-Hoërskool t. Hoërskool Kroonstad;

12:00: HTS Welkom t. Witteberg;

12:30: Welkom-Gimnasium t. Voortrekker.

Comments


Leave a Reply


error: Content is protected !!