Monday, July 4, 2022
All the latest schoolboy rugby news, results and stats


Voorskou – Grey-kollege vs. Menlopark

By Hannes Nienaber , in News , at 21 March 2014

GREY-KOLLEGE se eerste rugbyspan het reeds in sy drie wedstryde vanjaar bykans 200 punte opgestapel en slegs 14 punte afgestaan. Die span van die Rosestad kom vandag op sy tuisveld teen Menlopark van Pretoria te staan.

Die span van die Jakarandastad sal sy keer moet ken. Hy sal wel heel moontlik die sterkste teenstand nog vanjaar vir Grey bied. Grey het na dié kragmeting ‘n rits taai stryde wat op Kearsney-kollege se Paastoernooi en Wildeklawer op hom wag.

Grey het vanjaar al met Potchefstroom Gimnasium (53-0), Hentie Cilliers (60-14) en Hoërskool Klerksdorp (85-0) klaargespeel.

Die span se vleuel, Charl Pretorius het reeds vanjaar agt keer in vier wedstryde agter die doellyn gaan kuier. Die totaal sluit egter sy vier drieë vir Grey se vyftiental teen Goudveld-Hoërskool in. Hy en die heelagter Henry Immelman sal fyn deur die besoekers dopgehou moet word.

Menlopark sou verlede week teen Affies van Pretoria gespeel het, maar die kragmeting is weens nat velde afgestel. Menlopark het wel toe vir St. John-kollege van Johannesburg 22-0 verslaan.

Die Cherries kom teen Duineveld om 12:30 te staan en die span se heelagter Louwtjie Steenkamp sal sy spelpeil van Maandag vir die eerstespan teen Hoërskool Klerksdorp in die kragmeting wil voortsit. Steenkamp wat verlede jaar vir Landboudal van Jacobsdal uitgedraf het, het 31 van Grey se punte op losskakel teen Klerksdorp aangeteken.

Die Cherries se losskakel, Tokkie Kasselman se pa Chris Kasselman het op sy dag vir Transvaal en Vrystaat in dieselfde posisie diens gedoen. Chris het ook twee jaar die SA Skole-span gehaal.

In Jim Fouché se kragmeting op sy tuisveld teen Hoërskool Witteberg van Bethlehem sal die ervare skeidsregter Johan Wasserman die fluitjie blaas, terwyl sy seun Ruan op binnesenter vir die tuisspan uitdraf.

Die kragmeting skop om 13:20 af.

JF se vaskopstut, Anton Noordman kan met sy vurige inklimspel probleme vir die besoekers besorg.
Hoërskool Fichardtpark se rugbyspan kom vandag op Despatch se jaarlikse sportfees teen DF Malherbe te steen. Die wedstryd skop om 18:30 af. Nog ‘n span uit die streek De Aar sal om 17:30 teen HTS Port Rex van Oos Londen in aksie wees.

Die spanne is:

Grey-kollege: Henry Immelman, Charl Pretorius, Julian Jordaan, Mike Andrade, Niell Stannard, Dwayne Wessels, Dian Badenhorst, Alex Jonker (k), Jaques du Preez, Henry Slabbert, Kassel Rothman, Jurie Burger, Callie Janse van Vuuren, JC Janse van Vuuren, Ruben Terblanche.

Menlopark: Walter Groenewald, Tiaan Pienaar, Ruan de Beer, Wayne van der Bank, Armand Buys, Marko Dönges, Jeandré van der Walt, Marko Sauer, Arnold Gerber, Justin Meintjies (k), Jacques Oosthuizen, Willem Hofmeyr, Ruan Goosen, Janco Henning, Wian Pienaar.

Afskop: 13:45

Skeidsregter: Marlize Jordaan

Comments


Leave a Reply


error: Content is protected !!