Wednesday, August 10, 2022
All the latest schoolboy rugby news, results and stats


Virseker die nuwe titelborg van die Beeldtrofee

By Hannes Nienaber , in News , at 10 May 2016 Tags: ,

Virseker Beeldtrofee logoDie grootste en oudste skolerugbykompetisie in die land betree vanjaar ’n nuwe era.

Die Beeld Noordvaal Trofee sal voortaan as die Virseker Beeldtrofee bekend staan. Vanjaar se reeks is Dinsdag op ’n spoggeleentheid op die Bronberg-landgoed in Weiveld net buite Pretoria bekend gestel.

Die versekeringsmaatskappy Virseker is die nuwe hoofborg van die kompetisie na Beeld vir 21 jaar lank die hoofborg was. Beeld is steeds die gesamentlike titelborg en ook die mediavennoot van die kompetisie.

“Suid-Afrika is ’ n goudmyn van wêreldgehalte rugbytalent. Ons weet dat die Virseker Beeldtrofee nie net sal help met die ontginning, slyping en tentoonstelling van hierdie talent nie, maar ook met die verdere groei van ’n passievolle en trotse Afrikaanse rugbykultuur,” het Dawid Botha, bemarkingshoof van Virseker, gesê.

Daar word al sedert 1920 om die Virskeker Beeldtrofee voorheen bekend as die Beeld Noordvaal Trofee, Beeldtrofee, Administrateursbeker en die Direkteurstrofee, meegeding. Beeld is sedert 1995 die titelborg van die kompetisie.

“Dit is vir Beeld nog altyd belangrik om deel van die kompetisie te wees. Ons moes ’n besluit neem of dit nie dalk tyd was om ’n superborg aan boord te kry wat kan help om die kompetisie nog verder uit te brei nie,” het Barnard Beukman, redakteur van Beeld, gesê.

Meer as 180 skole in Gauteng, Mpumalanga, Limpopo en Noordwes neem aan vanjaar se reeks deel. Ongeveer 800 skolespanne neem vanjaar aan die kompetisie deel.

Daar is vyf afdelings in die Virseker Beeldtrofee. As ’n skool 175 seuns of minder het, sal hy in die kleinskole-afdeling speel. Skole met tussen 176 en 350 seuns sal as medium skole meeding.

Dié met seunsgetalle van tussen 351 en 599 sal hul slag in die afdeling vir groot skole wys, terwyl skole met 600 of meer seuns as makroskole geklassifiseer sal word. Daar is ook ’n middelskole-afdeling waarin skole speel wat meer seuns het as wat die reëls voorskryf vir klein skole, maar nie genoeg seuns het wat rugby speel nie.

Die verdedigende kampioene van die onderskeie afdelings is die Hoërskool Garsfontein (Makroskole), Helpmekaar-kollege (Grootskole), Ben Viljoen van Groblersdal (Mediumskole), die Hoërskool President (Middelskole) en Christiana (Kleinskole).

 

Comments


Leave a Reply


error: Content is protected !!