Sunday, June 26, 2022
All the latest schoolboy rugby news, results and stats


Sefoor sweef in Monnas se sege oor EG, Boishaai en Gim behaal ook goeie seges

By Hannes Nienaber , in News , at 12 June 2022

Monument van Krugersdorp is na Saterdag die enigste onoorwonne span oor in die Beker-kompetisie van Afdeling 1 van die Noordvaal-trofee.

Die Wit Bulle het met ‘n sege van 43-26 in Boksburg oor die enigste ander onoorwonne span in die liga ook sommer ‘n waarskuwing aan die ander spanne in die reeks gerig.

Dit is nooit maklik om ‘n sege in Boksburg te gaan haal nie, maar die span van Monnas het gewys dat hy vanjaar ongetwyfeld een van die gunstelinge is om vanjaar as kampioen van die reeks gekroon te word.

Sy losskakel, Tyler Sefoor, was op sy stukke en het twee keer ‘n draai agter die doellyn gemaak. Sy tweestryd met sy direkte teenstander, Jaydon Bantom, was een van die hoogtepunte van die kragmeting.

Monnas het ‘n voorsprong van 24-11 teen rustyd geniet, maar die Jansies het danksy ‘n drie deur sy heelagter, David Twala, vanaf die halflyn kort na rustyd terug in die kragmeting gewees.

Monnas was vir ‘n hele ruk hierna onder druk, maar ‘n blitzkrieg van twee drieë deur Sefoor en die regtervleuel, Marcey de Waal, het hul voorsprong binne die bestek van twee minute tot 36-19 gerek.

Twala het elke keer wat hy in besit gestel is gevaarlik gelyk. EG se kaptein en slot, Ryno van Aswegen, het ook ‘n goeie vertoning gelewer.

Paarl Gimnasium sal tevrede wees met die feit dat hy vir Oakdale Landbou met 42-10 op laasgenoemde se tuisveld net buite Riversdal kon kafdraf. Die span van die Paarl het teen rustyd maar ‘n skrale voorsprong van 7-3 geniet.

Sy skrumskakel, Emrique Liedemann, was uitstaande en het twee keer ‘n draai agter die doellyn gaan maak. Die span se voorry – Jean Fourie, Luca Bakkes en Ben Pitout het ‘n goeie dag op kantoor beleef.

Vir die Hoër Jongenskool Paarl was sy buitesenter, Shah-Jehaan de Jongh, vooraan die spits van sy oorwinning van 48-22 oor Boland Landbou. Boishaai se span begin al hoe meer sy ritme vind soos die seisoen vorder.

In een van die oudste tweestryde op skolevlak in Suid-Afrika het Rondebosch Boys’ High vir Bishops met 20-15 geklop. Die twee skole het mekaar in 1908 die eerste keer op die rugbyveld ontmoet met Bishops wat destyds met 112-0 baas was.

‘n Speler van Bishops Painton Cowen het op daardie dag ‘n ongelooflike 86 punte aangeteken, wat waarskynlik steeds die SA Skole-rekord vir ‘n wedstryd is.

Saterdag se kragmeting was die eerste keer sedert 2019 dat die twee spanne mekaar gepak het en die 198 wedstryd sedert 1908.

Bishops is steeds sonder sy invloedryke binnesenter, Bruce Sherwood, en die nederlaag is hul vierde op ‘n streep nadat hulle voor dit nog onoorwonne die seisoen was.

Menlopark het sy eerste sege van vanjaar se Noordvaal-trofee danksy ‘n klinkende oorwinning van 42-12 oor HTS Middelburg behaal. Waterkloof het vir Helpmekaar-kollege met 29-15 getroef, terwyl Noordheuwel te sterk vir Marais Viljoen van Alberton (50-8) was.

Die Hoërskool Ermelo is vir die eerste keer sedert 2013 as kampioen van die Pumas se grootskole-liga gekroon. Die Erries het vir Piet Retief in die eindstryd met 27-15 verslaan.

Die twee spanne sal ook dan tot die uitspeelrondes van Afdeling 2 van die Noordvaal-trofee deurdring. Ermelo se agtsteman, Kobus van Heerden, was uitstaande in die eindstryd.

FOTO: Marius Nortjé

Al die uitslae: 

NOORDVAAL-TROFEE

Afdeling 1

Beker: Monument 43, EG Jansen 26; Noordheuwel 50, Marais Viljoen 8; Waterkloof 29, Helpmekaar-kollege 15; Menlopark 42, HTS Middelburg 12.

Plaat: Hoërskool Nelspruit 28, Hoërskool Middelburg 5; Hoërskool Rustenburg 10, Montana 5.

Skild: Eldoraigne 23, Ligbron 12; Hoërskool Klerksdorp 19, Heidelberg Volkskool 10; Lichtenburg 71, Jeugland 0;.

Bowl: Die Anker 21, Hoërskool Pietersburg 21; Potchefstroom Volkskool 26, Wesvalia 19.

Afdeling 2

Blou Bulle: Wonderboom 30, Wagpos 25; Midstream College 23, Overkruin 21.

Limpopo: Frikkie Meyer 46, Ellisras 14.

Puma-eindstryd: Ermelo 27, Piet Retief 15.

Valke: Oosterlig 19, Brandwag (Benoni) 18.

Afdeling 3

Goue Leeus: Bekker 28, Allen Glen 20.

Limpopo: Curro Heuwelkruin 33, Louis Trichardt 24.

Puma-halfeindronde: Standerton 28, Lydenburg 15; Curro Nelspruit 12, Hoogenhout 3.

Valke: HTS Sasolburg 45, Stoffberg 5; HTS Sasolburg 48, John Vorster (Nigel) 10.

Afdeling 4

Limpopo-eindstryd: Warmbad 32, Eric Louw 17.

Afdeling 5

Luiperds-eindstryd: Koster 33, Ferdinand Postma 8.

NOORDVAAL

St. John’s College 56, St. Stithians College 9.

OOS-KAAP/KWAZULU-NATAL

Die Brandwag (Uitenhage) 38, Itembelihle 8; Hilton College 52, Kearsney College 10; Maritzburg College 42, Westville Boys’ High 26; Michaelhouse 54, St. Charles College 12; Selborne College 90, Cambridge 0; Dale College 13, Kingswood College 12; Graeme College 66, HTS Daniël Pienaar 3.

WES-KAAP

Paarl Gimnasium 42, Oakdale Landbou 10; Hoër Jongenskool Paarl 48, Boland Landbou 22; Rondebosch Boys’ High 20, Bishops 15; Wynberg Boys’ High 40, SACS 15; Parel Vallei 18, Melkbosstrand 18; Westerford 11, Vishoek 7.

Comments


Leave a Reply


error: Content is protected !!