Sunday, July 3, 2022
All the latest schoolboy rugby news, results and stats


Saints se 150ste bestaansjaar se rugbyfees skop vandag af

By Hannes Nienaber , in News , at 5 July 2013 Tags: , , , , , , , , ,

DAAR is een afdeling van die mooie spel rugby wat die Engelse skole veel beter as hulle meer geroemde Afrikaanse eweknieë onder die knie het dit is hardlooprugby. Dié Engelse skole se spel is meer gefokus op die ontwikkeling van die speler as mens en om vyftienman rugby te speel eerder as wenrugby ten alle koste.

Rugby fynproewers in die Rosestad kan dus gerus vandag ‘n draai by die eerste dag van die tweejaarlikse privaatskole-toernooi by St. Andrew maak. Saints bied vanjaar die toernooi aan ter viering van hulle 150ste bestaansjaar. Die toernooi is wel verlede jaar ook deur Penryn-kollege aangebied.

Die gasheer speel om 11:00 teen Clifton van Durban te staan. Dié span se heelagter Dean Tucker, agtsteman Lawrence Danso en slot Ross Middlecote is spelers wat staatmakers behoort te wees. Die span word aangevoer deur sy vaskopstut, Anthony Rawson. Saints beskik oor ‘n gedugte agttal, maar die span se agterhoede is nie bang om die bal lug te gee nie.

Die ander span van die Rosestad wat in aksie sal wees, Hoërskool Sentraal pak St. Benedict-kollege van Johannesburg in die hoofwedstryd vandag. Tralies sal die wedstryd sonder sy Akademie-week spelers aanpak. Die span se kaptein, Ryno Gerber sal hom wel more by die span vir sy tweede wedstryd teen St. Stithian-kollege aansluit. Die span sal gewis die teenwoordigheid van sy ander Akademie-spelers, die losskakel DP de Lange en slot SJ Wessels mis. Die span se drieëmasjien, Wian Koekemoer sal wel speel en hy behoort die besoekers van die Goudstad behoorlik op die verdediging te laat bontstaan.

Nog ‘n span om dop te hou is Michaelhouse van Natal. Die span se regtervleuel, Bader-Werner Pretorius was een van KwaZulu-Natal se voorste spelers op die Grant Khomo-week wat soos die Akademie-week gister tot ‘n einde geloop het.

Die Rosestad het laas in 2004 dié toernooi aangebied.

Vandag se bepalings is:

Hickling A: 09:00: Michaelhouse t. St. David-kollege; 11:00: St. Andrew t. Clifton; 13:00: St. Stithian-kollege t. St. Charles-kollege; 15:00: Sentraal t. St. Benedict-kollege. Hickling B: 09:30: Upland-kollege t. St. John-kollege; 11:30: St. Alban-kollege t. Thomas More; 13:30: Penryn-kollege t. Somerset-kollege.

Comments


Leave a Reply


error: Content is protected !!