Sunday, July 3, 2022
All the latest schoolboy rugby news, results and stats


Perses se Bezuidenhout gerat om SA Skolespan te slyp

By Hannes Nienaber , in News , at 17 July 2013 Tags: , , , , ,

WELKOM. – Die nuwe afrigter van die Suid-Afrikaanse Skole-rugbyspan, Roean Bezuidenhout is reeds besig om huiswerk op sy span se teenstanders volgende maand te doen. “Ek het verlede jaar al voor die onderhoud vir die pos begin om oor die Engelse en Franse spelers inligting in te samel. Ek het na dié nuus dat ek vanjaar die geleentheid gaan kry ook weer begin om inligting te bekom,” het Bezuidenhout gesê.

Hy sou verlede jaar ook soos vanjaar saam met Chris October van die Westelike Provinsie die nasionale skolespan gebrei het. Bezuidenhout kon egter weens logistieke redes nie die pos vul nie. Hy het wel die geleentheid gekry om verlede jaar by die nasionale o.16-oefenkamp sy stempel as afrigter af te druk. “Ek sien baie uit na die nuwe uitdaging. Ek het baie by Kassie Kasselman en Jacques Juries geleer. Ek het ook baie respek vir Heyneke Meyer,” het Bezuidenhout oor die uitdaging en sy afrigtings-mentors gesê.

Die SA Skole-span sal in drie kragmetings teen onderskeidelik Engeland, Frankryk en Wallis in Augustus in aksie wees.

Die laaste afrigters uit die sentrale streek wat by die SA Skole-span betrokke was is Griekwas se Ezzard Alexander en Vrystaat se Jaco Swanepoel in 2007. Die span se spanbestuurder Elliot Fana het ook van die Griffons afgekom.

Voor Bezuidenhout was die legendariese Dawie Crowther die laaste breier van die Noord-Vrystaat wat by die nasionale skolespan betrokke was. Laasgenoemde het dié span van 1992 tot en met 1994 afgerig.

Die langsdienende SA Skole-breier is die legend van Grey-kollege wyle Stoney Steenkamp. Hy het die Suid-Afrikaanse Skolespan van 1974 tot 1983 afgerig. Die skolespan is in 1974 die eerste keer na die Cravenweek gekies.

Indien Bezuidenhout se skoolspan Welkom-Gimnasium tot die uitkloprondes van die Griffons-liga deurdring sal sy verpligtinge by die nasionale span verhoed dat hy Gimmies in hierdie belangrike tydperk brei. Hy rig Gimmies saam met Piet van Vuuren af.

 

Comments


Leave a Reply


error: Content is protected !!