Wednesday, August 10, 2022
All the latest schoolboy rugby news, results and stats


Northerns wys hy kan weer krag in Shimla-liga wees

By Hannes Nienaber , in News , at 27 April 2014

HOERSKOOL NOORD-KAAP se eerste rugbyspan het met sy oortuigende sege van 40-12 oor Hentie Cilliers in Virginia gewys dat hy vanjaar weer ‘n sterk aanspraakmaker op die Kovsiestreek-kompetisie se Shimla-liga (vir mediumskole) sal wees. Hentie Cilliers is die toonaangewende span in die Griffon-liga.

Northerns se slot, Rikus Zwart was uitstaande in die wedstryd. Hy het al sy lynstaanballe gevat en fisiek gesag by die afbreekpunte afgedwing. Hy het ook ‘n hele paar kere met die bal onder die arm probleme vir die tuisspan besorg.

Die span van die Diamantstad was amper ‘n maand laas voor die kragmeting in aksie en sal belangrike momentum uit die kragmeting na die Wildeklawer-toernooi neem wat vandag by Hoërskool Diamantstad afskop.

Die span se losskakel, Robbie Petzer het met sy skopskoen goed gevaar. Hy was met vyf uit ses pogings na die pale suksesvol. Agterlangs het die vleuel Daniello Huyster en heelagter Wilfred Bowers ook goeie vertonings gelewer.

Landboudal van Jacobsdal het Welkom-Gimnasium 19-12 verslaan. Gimmies sal vandag wonder hoe hy die kragmeting verloor het. Die span van Welkom het meeste van die balbesit gehad met sy pak voorspelers wat die fisieke stryd gewen het. Die verloorspan het egter nie een van sy strafskoppe na die pale toe gekorrel nie.

Lanties het rustyd reeds ‘n voorsprong van 16-0 opgebou met sy Cravenweek-senter Kat Mabaleng wat ‘n aangeë in sy eie kwartgebied onderskep het om te gaan druk. Die vaskopstut, FC Smit was die enigste speler van die wenspan wat teenstand vir die fisieke aanslag van Gimmies gebied het. Die slot, Teubes Brits verdien ook ‘n klop op die skouer vir sy vertoning.

Agterlangs was Mabaleng en die losskakel Guillaume Oberholster yster. Vir Gimmies was die heelagter Francois Kuipers uitmuntend. Die stut, Fanie Vermaak het ook ‘n impak van die plaasvervangersbank gemaak. Die flank Byron Ferreira en senter SJ Malherbe kan ook kop omghoog oor hulle vertonings rondloop. Malherbe speel gewoontlik flank en het hom goed van sy taak in die middelveld gekwyt.

Die Cherries het in Bloemfontein vir Fichardtpark 26-0 getroef. Die tweede span van Grey-kollege was teen rustyd slegs 7-0 voor. Vir Fichies het sy pak voorspelers moedig vertoon met die flank Eckhardt Kuhn, agtsteman Pieter Coetzee, stut Jaco Potgieter en haker Wandré Nortjé wat almal moedig vertoon het. In die agterhoede het die senter Dewald Coetzee goeie spel gelewer.

Goudveld-Hoërskool was te sterk vir Sand du Plessis en het 32-11 in die twee spanne se vriendskaplike kragmeting koning gekraai. Sannies het mooi verdedig en slegs ‘n agterstand van 11-15 met lemoentyd gehad. Die span se agtsteman, JB la Cock, slot Brandon Terblanche, flank Jeandré Dorfling en losskakel Wayne van Heerden het goeie spel gelewer.

Brandfort het ‘n naelskraapse sege van 13-12 oor Paul Erasmus van Senekal behaal. Hennenman moes ook hard werk om sy ligawedstryd teen Riebeeckstad 15-12 te wen. Vir Hennenman het sys enter Gideon Serfontein, skrumskakel DT Ferreira en flank SF Kock die grootste aandele in die sege gehad.

Die Afrikaanse Hoërskool Kroonstad het Schoonspruit van Klerksdorp 50-0 uit die pad gevee. Rooiskool het rustyd reeds 24-0 voorgeloop. Die span se agtsteman, Johan Steyn het twee keer in die kragmeting gaan druk. Sy tweelingbroer en vleuel van die span, Louis het die aanvoorwerk vir sy eerste drie gemaak.
Vir die wenspan het sy flank JP Kalp, haker Herholdt Hills, senter Kobus Kleyn en flank Henry Searle uitmuntend vertoon. Rooiskool het die vorige week vir Wonderboom 16-12 geklop.

Voortrekker se vleuel, Apin Odendaal het ‘n driekuns aan drieë in sy span se oorwinning van 53-0 oor Dr. Malan behaal. Vir die Trekkers was Odendaal, die senter Boeta Vermaak en vleuel Tiisetso Madonsela uitstaande. 

Puntemakers:

Noord-Kaap 40 (14) – Drieë: Hannes Jacobs (2), Brandon de Melim, Morné Steynman, Bradley Leijdekkers, Rikus Zwart. Doelskoppe: Robbie Petzer (5). Hentie Cilliers 12 (0).

Landboudal 19 (16) – Drie: Kat Mabaleng. Doelskop: Guillaume Oberholster. Strafdoele: Oberholster (4). Welkom-Gimnasium 12 (0) – Drieë: Nazo Nkala, Danie Hendricks. Doelskop: Francois Kuipers. 

Goudveld 32 (15). Sand du Plessis 11 (6) – Drie: JB la Cock. Strafdoele: La Cock (2).

Voortrekker 53 – Drieë: Apin Odendaal (3), Boeta Vermaak (2), Jimmy Oosthuizen, Tiisetso Madonsela, Tokkie van Zyl, Donovan Bouwer. Doelskoppe: Van Zyl (4). Dr. Malan 0. 

Hennenman 15 – Drieë: Donovan Sithole, Gideon Serfontein, JP van Aswegen. Riebeeckstad 12.

Brandfort 13 – Drieë: Pieter Reynecke, Hanno Terblanche. Strafdoel: Reynecke. Paul Erasmus (Senekal) 12. 

AHS Kroonstad 50 (24) – Drieë: Johan Steyn (2), Herholdt Hills, Burnett Staal, Jeandré Uys, Francois Stemmet, Kobus Kleyn, Louis Steyn. Doelskoppe: Ruben Aucamp (5). Schoonspruit 0. 

AHS Kroonstad 16 – Drie: Johan Steyn. Doelskop: Ruban Aucamp. Strafdoele: Aucamp (3). Wonderboom 12.

Comments


Leave a Reply


error: Content is protected !!