Saturday, August 13, 2022
All the latest schoolboy rugby news, results and stats


Noordvaaltrofee vir Afdeling 2 kry heel moontlik staanplek in Limpopo

By Hannes Nienaber , in News , at 1 August 2022

Dit is heeltemal te vroeg om enige voorspellings te waag, maar daar is ‘n sterk moontlikheid dat die Noordvaaltrofee in Afdeling 2 ‘n staanplek iewers in Limpopo gaan kry.

Merensky van Tzaneen en Frikkie Meyer van Thabazimbi het albei klinkende seges op hul tuisvelde in die uitspeelrondes van die reeks behaal.

Die twee spanne het mekaar ook in die Limpopo-eindstryd gepak. Nog ‘n span vanuit Limpopo, die Hoërskool Ellisras, het ook tot die kwarteindronde van die reeks deurgedring.

Boonop sal albei spanne tuis in die reeks speel tensy hulle teen ‘n span van die Blou Bulle te staan kom. Die enigste span uit Blou Bul-kontrei wat nog in die reeks na die uitspeelrondes is, is Midstream College.

Merensky het vir Leeuwenhof Akademie met 50-12 in Tzaneen afgestof. Die span se slot Henro Delport het twee keer die besoekers se doellyn oorgesteek.

Die span van Tzaneen se volgende wedstryd in die kwarteindronde sal op sy tuisveld teen die Hoërskool Ermelo wees. Die span van Ermelo het Potchefstroom Gimnasium met 30-17 in hul uitspeelwedstryd verslaan.

Frikkie Meyer het vir die Hoërskool Randburg met 66-12 afgeslag. Die wenspan se Ulrich Gilbert en agtsteman, HJ Janse van Rensburg, het albei dubelle driedruk-plesier ervaar.

Janse van Rensburg is die jonger broer van Benhard Janse van Rensburg wat op losskakel en senter vir onder meer die Cheetahs en London Irish uitgedraf het. Laasgenoemde speel tans nog vir London Irish.

Frikkie Meyer se vaskopstut, Vian Horn, het boonop agt van sy span se nege drieë verdoel. Horn is die susterskind van die gewese Springbok-slot, Victor Matfield.

Die span van Thabazimbi sal die komende naweek teen die Valke se kampioen, Brandwag van Benoni, te staan kom. Brandwag het in sy uitspeelwedstryd vir Wonderboom met 40-26 die loef afgesteek.

Die span van Benoni se losskakel, Tristan Pelser, het met sy taktiese skopwerk daarin geslaag om Wonnies se agterste driehoek on druk te plaas. Hy het ook ‘n hele paar keer met skerp breekslae die span van Pretoria se verdediging behoorlik beproef.

Twee spanne wat Limpopo se partytjie kan bederf, Midstream College en Piet Retief, pak mekaar in die kwarteindronde. Midstream College het sy plek in die ronde met ‘n sege van 24-15 oor Hans Strijdom van Naboomspruit bespreek.

Die span van Centurion se haker, Franco du Toit, was meer as ‘n handvol vir Hans Strijdom om te hanteer. Vir die Hansies het sy agtsteman, Frikkie Geyser, ‘n blink vertoning opgedis.

Midstream College se losskakel, Christaan Mare, het twee keer verby die verdediging van die Hansies geglip om ‘n draai agter die doellyn te maak.

Piet Retief moes hard sweet op sy tuisveld om vir Wagpos van Rustenburg met 18-14 met die kous oor die kop huis toe te stuur. Die wenspan se Londa Mkhize, Mpho Sekhoto en Timothy Ntshangase kan meer as tevrede met hul vertonings in die sege voel.

Ellisras het daarin geslaag om vir Hoërskool Florida met 22-5 te troef. Florida het vroeër vanjaar die titel as kampioen van die Pukke se Sport-reeks verower, so dit is duidelik dat Ellisras self oor ‘n gedugte span beskik.

Florries se slot Denver Kaundule het sy seisoen met ‘n skitterende vertoning ondanks die nederlaag afgesluit. Kaundule is ewe gemaklik aan die kant van die skrum.

Die span van Lephalale sal in die kwarteindronde op sy tuisveld teen Oosterlig van Boksburg te staan kom. Oosterlig

Oosterlig het danksy die feit dat hy in die tweede helfte tot ‘n hoër rat in sy kragmeting teen Pretoria-Noord kon oorskakel met die telling op 38-26 as oorwinnaars van die veld gestap. Die span van Pretoria het met die omdraaislag ‘n voorsprong van 21-19 geniet.

Die span van Boksburg se regtervleuel, Heinrich Bestbier, het twee keer gaan druk danksy sy opvolgwerk na goeie taktiese skoppe. Die span se fiksheid het gesorg dat hy in die laaste 20 minute genoeg in sy petroltenk oorgehad het om die kragmeting deur te trek.

Puntemakers: 

Midstream College 24 () – Drieë: Christiaan Mare (2), Jacques Vos, Rowan Lindeque. Doelskoppe: Jaedon de Leeuw (2). Hans Strijdom 15 () – Drieë: Frikkie Geyser, Hannes Fourie. Strafskop: Fourie, Doelskop: Fourie.

Merensky 50 (17) – Drieë: Henro Delport (2), Clifford Ledwaba, Tirelo Mashapa, Klokke Mohlala, Zander Heydenrych, Mahlatse Semosa, Dirk de Nyschenn. Doelskoppe: Philip Ludick (3), Mohlala (2). Leeuwenhof Akademie 12 (0) – Drieë: 8 (2). Doelskop: .

Ellisras 22 (12) – Drieë: Gerdro Grobler, Hope Seaga, Johan van Deventer. Doelskoppe: Grobler (2). Strafdoel: Mabotha Gwangwa. Florida 5 (5) – Drie: Tristan de Hart.

Brandwag (Benoni) 40 (14) – Drieë: Werner Moorcroft (2), Sheldon Lucas, Tristan Pelser, Eben Pretorius, Nelis van Rooyen. Doelskoppe: Lucas (5). Wonderboom 26 (14) – Drieë: Justin Helena (2), Wian Louw, Thapelo Simangwe. Doelskoppe: Helena (2), Louw.

Ermelo 30 () – Drieë: Geen inligting ontvang. Potchefstroom Gimnasium 17 () – Drieë: Enrique Claassen (2). Doelskoppe: Jason Greyvenstein (2). Strafdoel: Greyvenstein.

Piet Retief 18 () – Drieë: Timothy Ntshangase, Wandile Mathe. Doelskop: Zander Coetzee. Strafdoele: Coetzee. Wagpos 14 ().

Oosterlig 38 (19) – Drieë: Heinrich Bestbier (2), Boeta Nieuwenhuisen, Damian Damoney, Mariques Pretorius, Hanco du Plooy. Doelskoppe: Caiden Serfontein (4). Pretoria-Noord 26 (21) – Drieë: Geen inligting ontvang.

Frikkie Meyer 66 () – Drieë: Ulrich Gilbert (2), HJ Janse van Rensburg (2), Edward Terblanche, De Wet van der Walt, Tommie Swanepoel, Tristan Baart, Janco van Deventer. Doelskoppe: Vian Horn (8). Randburg 12 () – Geen inligting ontvang.

Ander spanne: 

o.16: Overkruin 18, Hans Strijdom 15; Ellisras 21, Oosterlig 13; Dinamika 30, HTS Tom Naude 26; Pretoria-Noord 11, Hans Moore 10; Bergsig 14, Ermelo 10; Potchefstroom Gimnasium 22, Rob Ferreira 21; Leeuwenhof 26, HTS John Vorster 14; Merensky 40, Randburg 14;

o.15: HTS John Vorster 33, HTS Tom Naude 0; Merensky 73, Leeuwenhof 15; Frikkie Meyer 10, Randburg 7; Brandwag 54, Pretoria-Noord 7; Ermelo 55, Potchefstroom Gimnasium 12; HTS Witbank 17, Wagpos 13; Hans Moore 26, Midstream College 10; Hans Strijdom 19, Dinamika 15.

o.14: Frikkie Meyer 17, Pretoria-Noord 10; Ben Viljoen 28, Brandwag 7; Randburg 17, Merensky 12; Hans Moore 6, Midstream College 0; Piet Retief 17, Bergsig Akademie 7; Potchefstroom Gimnasium 20, HTS Witbank 18; Driehoek 24, HTS John Vorster 22; Dinamika 19, Ellisras 10.

Comments


Leave a Reply


error: Content is protected !!