Nr. 1 dalk in Kimberley gekroon, maar daar is meer as twee aanspraakmakers

Written by Hannes Nienaber

NewsG_Emrique_Liedeman School of Rugby | Nr. 1 dalk in Kimberley gekroon, maar daar is meer as twee aanspraakmakers - School of RugbyDie hoofwedstryd van die Wildeklawer-toernooi more hier op die hoofveld van die Hoërskool Diamantveld tussen Grey-kollege en Paarl Gimnasium kan dalk vanjaar weer bepaal wie die seisoen as Suid-Afrika se voorste skolespan afsluit.

Dit is egter nie ‘n uitgemaakte saak nie, want daar is nie vanjaar veel te kies tussen die voorste vyf skolespanne in die land nie. Garsfontein, Affies en die Hoër Jongenskool Paarl kan ook nog vanjaar ‘n kleim vir die boonste posisie op die ranglys afsteek.

Paarl Gimnasium was weer op hul stukke nadat hy die vorige week teen Affies vasgeval het. Gimmies het vir Helpmekaar-kollege met 59-12 ore aangesit.

Gimmies het 38 punte in die tweede helfte aangeteken sonder dat Helpies enige punte by hul totaal kon voeg. Die wenspan se senterpaar, PA van Niekerk en Janeil Losper, was op hul stukke.

Die losskakel, Liam Koen, moes die veld weer weens ‘n skouerbesering verlaat en sal nie more teen Grey in aksie wees nie. Koen sal waarskynlik nie weer die seisoen in aksie wees nie.

Grey-kollege het self ‘n indrukwekkende sege behaal deur vir Boland Landbou met 40-12 verslaan. Die span van Bloemfontein se flank Lukas Meyer het weer die veld vol gespeel, terwyl die senterpaar, Alex McIntyre en Ulrich Wahl, ook goeie vertonings opgedis het.

Boland Landbou se kaptein en binnesenter, Freddie Dreyer, is egter ‘n speler wie se naam nog baie gehoor sal word.Create_Infinity2 School of Rugby | Nr. 1 dalk in Kimberley gekroon, maar daar is meer as twee aanspraakmakers - School of Rugby

Garsfontein het aanvanklik gesukkel om sy ritme te vind, maar die Bere van Pretoria het steeds nie veel probleme ondervind om Framesby met 45-13 af te stof nie.

Die span se skrumskakel, Steven Nel, is sonder twyfel een van die voorste skrumskakel op skolevlak in Suid-Afrika. Hy het twee keer Framesby se doellyn oorgesteek.

Garsies het heelwat van sy eerstekeuse spelers ruskans teen Framesby gegee, maar behoort more teen Paul Roos weer op volle sterkte te wees.

Die Hoër Jongenskool Paarl was oortuigend met 38-3 baas oor Maritzburg College. Boishaai se slot Ben Heydenrych is vir ‘n goeie vertoning met twee drieë beloon.

Waterkloof se afrigter Cobus van Dyk is die gelukkigste man hierdie week in rugby. Eers was hy Maandag deel van Tukkies se afrigtingspan wat na ‘n omstrede drie in die doodsnikke as kampioen van die Varsitybeker gekroon het.

Saterdag het sy skoolspan ‘n sege van 19-17 oor Diamantveld in die doodsnikke beklink danksy ‘n drie deur die slot Dale Arlow. Die kykweer het gewys dat Arlow die bal duidelik aangeslaan het, maar die skeidsregter, Darren Colby, se toekenning van die drie het bly staan.

Die gasheer sal voel hul is van ‘n roemryke sege beroof, terwyl die Klofies sal voel dat die geluk aan hul kant was.

Affies het in die eerste wedstryd van die toernooi so bietjie soete wraak teen Oakdale Landbou met ‘n oorwinning van 25-7 geneem. Die Wit Bulle het al teen rustyd ‘n voorsprong van 20-7 opgebou.

Oakdale het verlede jaar vir Affies op sy tuisveld in Pretoria tydens die Noord/Suid-toernooi met 46-21 verslaan. Dit was destyds Oakdale se eerste sege oor Affies.

Die Wit Bulle se flank, Dieter Schubert, asook die vleuel Marx Nel het elk ‘n reuse aandeel in hul span se sege gehad.

Outeniqua het die grootste opskudding van die eerste ronde wedstryde gelewer toe hy vir Monument met 18-7 verslaan het. Die Kwaggas se agtsteman, Camden Schoeman, was aan die voorpunt van sy span se sege.

Noordheuwel van Krugersdorp sal sy titel as kampioen van die NWU Prestige-reeks volgende week teen die Hoërskool Middelburg verdedig.

Die Nories het vir Lichtenburg met 45-0 in die halfeindronde in Rustenburg kaf gedraf. Middies het in sy halfeindstryd vir Oos-Moot in ‘n strawwe tweestryd met 17-13 verslaan. Die verloorspan het met die omdraaislag ‘n voorsprong van 13-0 geniet.

In die NWU Sportreeks sal die Hoërskool Florida teen Overkruin van Pretoria in die eindstryd te staan kom. Florida het met ‘n sege van 49-12 oor Randburg sy plek in die eindstryd bespreek, terwyl Overkruin vir Dr. Malan met 33-12 die loef in die ander halfeindstryd afgesteek het.

Hilton College het tydens die viering van sy 150ste bestaansjaar sy aartsvyand, Michaelhouse, met 32-17 geklop om seker te maak die oud-leerlinge het so ietsie ekstra om oor fees te vier.

Selborne College van Oos-Londen vie rook sy 150ste bestaansjaar met ‘n rugbyfees. Hy het in die hoofwedstryd van die eerste dag vir SACS met 24-8 geklop. Die Brandwag van Uitenhage se oorwinning van 15-0 in die eerste wedstryd van die fees oor Queen’s College wys dat hulle onder die Top 20 tel.

AL DIE UITSLAE: 

WILDEKLAWER

Paul Roos Gimnasium 43, Glenwood 20; Outeniqua 18, Monument 7; Hoër Jongenskool Paarl 38, Maritzburg College 3; Paarl Gimnasium 59, Helpmekaar 12; Grey-kollege 40, Boland Landbou 12; HTS Drostdy 25, Welkom Gimnasium 23; Waterkloof 19, Diamantveld 17; Garsfontein 45, Framesby 13;  Durban High School 31, Menlopark 15; Stellenberg 36, Noord-Kaap 7; Affies 25, Oakdale Landbou 7.

SELBORNE COLLEGE 150-FEES

Selborne College 24, SACS 8; Grey High School 33, St. John’s College 7; Brandwag (Uitenhage) 15, Queen’s College 0; Rondebosch Boys’ High 47, St. Andrew’s College 7; Kingswood 14, Dale College 10.

GWK LANDBOUSKOLE-TOERNOOI

Marlow Landbou 24, Hoërskool Trio 11; Merensky 24, Landboudal 19.

SENTRAAL SPORTFEES

Goudveld-Hoërskool 27, Hoërskool Pietersburg 13; Fichardtpark 76, Kalahari (Kuruman) 17; Sentraal 17, Pearson 15; Duineveld 40, Jim Fouché 25.

NWU PRESTIGE-REEKS

Hoërskool Middelburg 17, Oos-Moot 13; Noordheuwel 45, Lichtenburg 0; Die Anker 52, Heidelberg Volkskool 5; Hoërskool Rustenburg 32, Zwartkop 10; Wesvalia 29, Potchefstroom Volkskool  12; Montana 42, Potchefstroom Gimnasium 5; Marais Viljoen 41, Hugenote (Springs) 17; Jeugland 50, Oosterlig 21.

NWU SPORTREEKS

Florida 49, Randburg 12; Overkruin 33, Dr. Malan 12.

VRIENDSKAPLIK

Nico Malan 36, Muir College 14; Charlie Hofmeyr 44, Bredasdorp 3; DF Malan 18, Swartland 6; Hoërskool Strand 31, Hermanus 15; HTS Witbank 27, Ermelo 22; Kearsney College 29, Northwood 17; Hilton College 32, Michaelhouse 17; King Edward VII 29, Parktown Boys’ High 0; Jeppe 36, Pretoria Boys’ High 12; Westville Boys’ High 48, St. Charles College 17.

[powr-comments id="a28e99d5_1651382141469"]