25 pronk-rugbyskole: Boek gee perspektief

Written by Hannes Nienaber

25_Great_South_African_Rugby_Schools School of Rugby | 25 pronk-rugbyskole: Boek gee perspektief - School of RugbyDit is bykans net so onbegonne taak om die Suid-Afrika se 25 voorste skolerugbyfabrieke te identifiseer, as om die beste Springbokspan van alle tye te kies.

Suid-Afrikaners neem hulle rugby ernstig op, maar veral as dit by die Springbokke en skolerugby kom.

Dit is dan ook hoekom die jongste boek oor skolerugby in Suid-Afrika, 25 Great South African Rugby Schools, deur Don Nelson Uitgewers natuurlik die skolerugbygemeenskap sal verdeel. Dit tel egter onder van die beste boeke oor die onderwerp wat nog in Suid-Afrika vrygestel is.

Die feit dat verteenwoordigers van die onderskeie skole self die skryfwerk asook die statistiek vir die boek verskaf het, dra by tot die gehalte van die inligting wat op die 320 bladsye vasgevang is.

Die boek bevat die lyste van die Cravenweek- en SA Skole-spelers wat die onderskeie skole oor die jare opgelewer het asook ‘n lys van die manne wat dié onderskeie skole se eerstespanne aangevoer het.

In 1997 het ‘n soortgelyke publikasie met die naam, Top South African Rugby Playing Schools, verskyn. Dit is destyds deur Chris Dutton en Michael Collins saamgestel, terwyl van die onderskeie skole ook hul eie stories geskryf het. Die boekie het destyds 26 van Suid-Afrika se voorste rugbyskole se geskiedenis geboekstaaf.

Daar sal ongetwyfeld met só ‘n boek wat dié land se voorste rugbyfabrieke uitsonder ‘n hele paar skole wees wat nie gelukkig met hul uitsluiting sal wees nie. Veral die skole wat die afgelope dekade hulself onder die voorste rugbyskole in die land gevestig het, soos die Hoërskool Stellenberg, die Hoër Landbouskool Oakdale, Welkom Gimnasium, die Hoërskool Garsfontein en die Hoërskool Waterkloof om net ‘n paar te noem.

Ontluikende kragte soos Helpmekaar-kollege en HTS Drostdy het wel die uitgelese skole vir die boek gehaal. ‘n Skool soos Michaelhouse wat ook die lys gehaal het, het wel eers in 2010 met Pat Lambie sy eerste Springbok opgelewer.

Dit is egter ‘n voldwonge feit dat die 25 skole ‘n totaal van 394 van die 921 Springbokke tot vandag opgelewer het. Tien van dié skole – Paul Roos, Grey-kollege, Hoër Jongenskool Paarl, Paarl Gimnasium, Bishops, Grey High, Rondebosch Boys’ High, SACS, Wynberg Boys’ High en Maritzburg-kollege het egter vir 279 van die Bokke gesorg.

Indien jy nog ‘n kersgekenk moet aanskaf vier iemand wat ‘n oudleerling van een van dié spogskole is of vir ‘n ywerige skolerugbyondersteuner dan is hierdie die perfekte geskenk.

25 Great South African Rugby Schools saamgestel deur Don Nelson en Lucinda Fransman. Uitgewer: Don Nelson. Prys: R450 (sagteband) en R550 (hardeband).

[powr-comments id="b3b18faa_1639892196938"]