Saturday, August 13, 2022
All the latest schoolboy rugby news, results and stats


Menlopark laat Affies aanvanklik sweet vir sy oorwinning

By Hannes Nienaber , in News , at 5 June 2022 Tags: , , , , , , , , ,

NewsG Affies RugbyMenlopark het vandag “op die plaas” so byna die onmoontlike reggekry deur die tuisspan, Affies, behoorlik te laat sweet vir hul 21-6 oorwinning.

Hierdie uitslag was egter tot vyf minute voor die eindfluitjie steeds in die weegskaal. Die besoekers het met rustyd 6-0 voorgeloop.

Dit was die eerste keer sedert 2006 dat die twee spanne mekaar op die rugbyveld ontmoet het.

Die Parkies verdien krediet vir die wyse waarop hulle die gunstelinge se sterkpunte telkens geneutraliseer het.

Dit was duidelik dat Nico Luus en sy afrigtingspan hul huiswerk behoorlik gedoen het. Dit, en die talle strafskoppe wat die Wit Bulle afgestaan het, het die tuisspan tot diep in die tweede helfte gefrustreer.

Trouens, van Affies se gebruiklike dodelike rolmaalbewegings is min gesien. Hulle het telkemale lynstane afgedwing in gunstige posisies, net om die bal te verloor.

Menlopark sal tevrede wees met hul dodelike verdediging. Dit, gekombineer met die geleerde skopvoet van losskakel Marco Strydom, het vir Affies weggehou van hul doelgebied. .

Die tuisspan het in die veertigste minuut vir die eerste keer die voortou geneem met ‘n drie deur haker Hanro Venter, na sterk dryfwerk deur die Affie-voorspelers. Hierna het die Wit Bulle gaandeweg beheer verkry, maar Menlo se verdediging het gehou.

Strydom het agt minute voor die eindfluitjie ‘n kans gehad pale toe om vir die besoekers weer te laat voorloop, maar hy het die skop links verby getrek.

Affies het hierna danksy mooi samespel deur voor- en agterspelers sake beklink deur twee pragdrieë, eers deur senter Tiaan de Wet, en toe deur die woelige haker Venter. Losskakel Stehan Heymans het die res van die punte bygedra met die skopskoen.

Vir die tuisspan was niemand beter as buitesenter, Heinrich Horn, nie. Hy het telkemale die besoekers se verdediging beproef met sterk lopies. Dit was definitief sy beste vertoning van die seisoen.

Vir Menlo kan Strydom tevrede wees met sy vertoning.

Affies sal in hul skik wees met hul onderskeie spanne nadat hulle skoonskip gemaak het in die res van die wedstryde.

Hulle het op die dag 449 punte aangeteken in die nege wedstryde, teen Menlopark se 49.

FOTO: William Brown

Puntemakers: 

Affies 21 (0) – Drieë: Hanro Venter (2), Tiaan de Wet. Doelskoppe: Stehan Heymans (3). Menlopark 6 (6) – Strafdoele: Marco Strydom (2). 

Ander spanne: 

o.16A: Affies 69, Menlopark 8.

o.15A: Affies 45, Menlopark 6.

o.14A: Affies 26, Menlopark 7.

[powr-comments id=”327b4294_1654404003282″]

Comments


Leave a Reply


error: Content is protected !!