Saturday, August 13, 2022
All the latest schoolboy rugby news, results and stats


Jansies behou onoorwonne status met sege oor Helpies

By Hannes Nienaber , in News , at 5 June 2022 Tags: , , , , , , , , ,

NewsG Noordheuwel rugbyDr. EG Jansen van Boksburg is steeds onoorwonne in vanjaar se Noordvaal-trofee se Beker-kompetisie.

Die Jansies het Saterdag in die Goudstad vir Helpmekaar-kollege met 26-12 geklop om ‘n voltal punte terug na die Oos-Rand te neem. EG gaan nie sommer vanjaar veral op sy tuisveld dit maklik vir die ander spanne in die reeks maak nie. 

Dit was weer die losskakel, Jaydon Bantom, wat met sy spelskeppende vermoë aan die voorpunt van die Jansies se aanslag was. Dit terwyl die heelagter, David Twala, asook die senterpaar, Marco Coetzee en Theuns Barnard, ook breëbors weens hul blink vertonings teen Helpies kan rondloop. 

EG se kaptein en slot, Ryno van Aswegen, het voorlangs die pap dik aangemaak. Van Aswegen het die veld vol gespeel en sy span van voor gelei. 

Vir Helpies het sy haker, Ruan Welman, sy kant gebring. Agterlangs het die binnesenter, Rynhardt van der Linde, ‘n hele paar goeie breekslae ingekry en ook die aanvoorwerk vir een van Van Rhyn se drieë gedoen. 

Noordheuwel het op sy tuisveld in Krugersdorp ‘n klinkende sege van 44-7 oor HTS Middelburg se Rooi Bulle behaal.

Die Nories se loskopstut, Arné Roux, het twee keer oor die doellyn gebars, terwyl die span se buitesenter, Marshall de Vos, ook twee keer gaan druk het. Soos gewoonlik was die losskakel, JT Kapank, ook op sy stukke en het hy ‘n bydrae van 14 punte met sy skopskoen gelewer.

Die Hoërskool Garsfontein was vir die eerste 40 minute van sy kragmeting teen Waterkloof op laasgenoemde se tuisveld vuurwarm. Die Garsie Bere het in vyfde rat weggetrek en reeds teen rustyd ‘n voorsprong van 24-0 opgebou. 

Die agttal het voorlangs onder een kombers gespeel en dit het Garsies se agterhoede in staat gestel om te baljaar. Garsies se buitesenter, Dimitre Erasmus, asook die twee vleuels, Boeloe Scott en Liam Dick, het skitterende agterlyn drieë vir die wenspan gedruk.

Die span se skrumskakel, Steven Nel, se vertonings vanjaar gaan net van krag tot krag. Hy tel sonder twyfel onder een van die voorste skrumskakel in skolevlak in Suid-Afrika vanjaar. Nel het sy span se vierde drie in die eerste helfte gedruk om die bonuspunt te beklink. 

Nel kan takties goed vanaf albei voete skop en dikteer die spel van agter die oond. Hy beskik self oor ‘n skerp breekslag, maar sy grootste bate is egter sy vermoë om die spel goed op te som en die regte keuses op die oomblik uit te voer. 

Voorlangs verdien elke speler in die agttal ‘n klop op die skouer, maar die agtsteman, Maynard Kleynhans, asook die slot Christopher Sjöblom begin al hoe meer in statuur groei. Die teenwoordigheid van die flank Abrie van der Westhuizen wat na ‘n besering teruggekeer het, het ook ‘n beduidende verskil gemaak. 

Vir Klofies is sy heelagter, Reuvan Ferreira, vir sy moedige vertoning met ‘n drie in die tweede helfte beloon.

FOTO: Marius Nortjé

Puntemakers: 

Garsfontein 36 (24) – Drieë: Dimitre Erasmus, Boeloe Scott, Liam Dick, Steven Nel, Christopher Sjblom, De Wet Lottering. Doelskoppe: Nic-Allen Gabrielsen (3). Waterkloof 7 (0) – Reuvan Ferreira. Doelskop: Johan Stroh.

EG Jansen 26 (12) – Drieë: David Twala (2), Jaydon Bantom, Keano van Loggenberg. Doelskoppe: Bantom (3). Helpmekaar-kollege 12 (7) – Drieë: Luc van Rhyn (2). Doelskop: Trityne Parsons.

Noordheuwel 44 – Drieë: Arné Roux (2), Marshall de Vos (2), Coun-Lee Koekman, Matthew Ganame. Doelskoppe: JT Kapank (4). Strafdoel: Kapank. Skepdoel: Kapank. HTS Middelburg 7 – Drie: Jonathan Durrheim. Doelskop: Hardus Visser.

Ander spanne: 

o.16: Waterkloof 27, Garsfontein 7; Noordheuwel 66, HTS Middelburg 3; EG Jansen 31, Helpmekaar 20. 

o.15: Waterkloof 25, Garsfontein 17; Noordheuwel 52, HTS Middelburg 0; Helpmekaar 5, EG Jansen 0.

o.14: Waterkloof 28, Garsfontein 12; Noordheuwel 41, HTS Middelburg 13; Helpmekaar 29, EG Jansen 0.

[powr-comments id=”37fc8876_1654404706239″]

Comments


Leave a Reply


error: Content is protected !!