Thursday, August 18, 2022
All the latest schoolboy rugby news, results and stats


Helpies en Gimmies deur tot Grootskole eindstryd

By Hannes Nienaber , in News , at 16 August 2015

Helpmekaar-kollege moes sy keer aan die einde van sy Beeld Noordvaal Trofee halfeindstryd vir grootskole teen Oos-Moot ken. Helpies het met ‘n sege van 24-19 tot die eindstryd van die kompetisie deurgedring.

Oos-Moot het egter meeste van die speelwerk in die wedstryd gedoen en toe sy heelagter, Tiaan Bedford, met speeltyd so te sê verstreke oor die doellyn val het die tuisspan se skare gejubel. Die skeidsregter, Wilko Esterhuizen, was in ‘n goeie posisie en het die aangee na Bedford as vorentoe beoordeel. Indien Bedford se drie toegeken was sou die doelskop bepaal het wie tot die eindstryd teen Potcchefstroom Gimnasium deurdring.

Die grootste verskil tussen Helpies en Oos-Moot was die wenspan se losskakel, Justin Taylor. Sy verspreiding agterlangs het aan Helpies se agterhoede genoeg ruimte geskep om gate in die tuisspan se verdediging te vind. Dit terwyl Oos-Moot se hantering agterlangs hom in die steek gelaat het.

Taylor het deur ‘n gaping geglip wat op die eerste drie van die kragmeting deur MP Hendriks uitgeloop het. Helpies het daarna nog twee keer gaan druk om rustyd met 21-0 voor te loop.

Therance Kingsburgh het op die vleuel vir Hendriks ‘n paar keer probleme besorg. Indien hy meer gehalte balbesit in die tweede helfte kon kry sou dit interresant geraak het. Oos-Moot se skrumskakel, Johan Marais, was sy span se beste speler op die veld.

Potch Gimmies het in die ander halfeindstryd ‘n merkwaardige sege van 21-10 oor Ben Vorster in Tzaneen behaal. Die span van Potchefstroom het vooraf geweet dat die hitte en die meer as 500km ‘n reuse beproewing sou wees.

Die twee spanne het met die telling op 3-elk gaan rus.

In die mediumskole-liga sal daar ‘n nuwe kampioen in 2015 gekroon word na Piet Potgieter van Potgietersrus vir Vryburg in ‘n rillerstryd met 33-32 uitgeskakel het. Vryburg moes al sy wedstryde in die uitkloprondes weg van die huis speel indien hy sy titel as kampioen wou behou.
Ben Viljoen van Groblersdal sal die gasheer van die eindstryd wees na hulle die Blou Bulle se kampioenspan, Midstream College, met 29-23 in die Jakarandastad getroef het.

Die halfeindstryde van die eerstespanne in die Makroskole-afdeling sal eers Dinsdag beslis word. Garsfontein sal gasheer vir die Hoërskool Monument van Krugersdorp speel, terwyl die ander halfeindstryd deur EG Jansen in Boksburg aangebied sal word. Die span van Boksburg sal die Rooi Bulle van die HTS Middelburg pak

Comments


Leave a Reply


error: Content is protected !!