Sunday, July 3, 2022
All the latest schoolboy rugby news, results and stats


Grey PE wil spook verjaag

By Hannes Nienaber , in News , at 21 March 2014

GREY BOYS’ HIGH SCHOOL sal vandag op die jaarlikse rugbydag wat deur Graeme-kollege in Grahamstad aangebied word prober om sy spook teen Marlow Landbou van Cradock op dié dag te verjaag.

In die twee spanne se vorige ontmoetings op dié rugbydag het Marlow Landbou elke keer daarin geslaag om met ‘n enkele punt as oorwinnaar van die veld te stap. In 2009 was die span van Cradock 16-15 baas, terwyl hy in 2011 met 24-23 koning gekraai het. Die span van die Baai is egter vanjaar ‘n span om mee deeglik rekening te hou.

Agterlangs het Grey in die losskakel Curwin Bosch, vleuel Dylan Vermaak en heelagter Keanu Vers genoeg skietgoed om meeste spanne hoofbrekens te gee. Vermaak is ‘n groot vleuel wat ook nie te kort skiet as dit by vaart kom nie. Vers, Vermaak en die senter Jeremy Ward was almal verlede jaar vir die Oostelike Provinsie op die Cravenweek in Polokwane in aksie.

Grey het die laaste kragmeting tussen die twee spanne op sy jaarlikse fees in 2012 gemaklik40-25 gewen.

Vir Marlow behoort sy agtsteman Luigy van Jaarsveld en skrumskakel Jordaan Schoeman sleutelspelers te wees. Die span van Cradock moet boonop more weer homself gereed he vir nog ‘n kragmeting wanneer hy op die tweede dag van die Despatch Sportfees teen Swartland in aksie is.

Graeme-kollege kom teen Dale-kollege van King Williamstown in die hoofwedstryd van sy dag te staan. Die kragmeting tussen Selborne-kollege en Framesby, sowel as die wedstryd tussen St. Andrew-kollege en Brandwag van Uitenhage behoort ook vir hope vuurwerk te sorg.

In die wedstryd tussen Queens-kollege en Kingswood-kollege kan toeskouers gerus die spel van die linkervleuel, Jerry Danquah dophou. Hy het verlede jaar op die Cravenweek vir Grens met sy spel beindruk.
Despatch draf in die hoofwedstryd van die eerste dag van sy jaarlikse sportfees teen Hangklip uit.

Vandag se skolerugby bepalings:

Graeme-kollege Rugbydag – 08:00: Muir-kollege t. Port Alfred; 09:10: Cambridge t. Pearson; 10:20: Hudson Park t. Nico Malan; 11:30: Grey Boys’ High School t. Marlow Landbou; 12:40: Selborne-kollege t. Framesby; 13:50: St. Andrew-kollege t. Brandwag (Uitenhage); 15:00: Kingswood-kollege t. Queens-kollege; 16:10: Graeme-kollege t. Dale-kollege.

Despatch se Sportfees – 09:30: Cillie t. Humansdorp Sekondêr; 10:30: Uniondale t. Hoërskool Uitenhage; 11:30: Victoriapark t. Soloman Mahlangu; 12:30: Bergsig t. Winterberg Landbou; 13:30: Kirkwood t. Werda; 14:30: Hoërskool Middelburg t. Andrew Rabie; 15:30: Burgersdorp t. Alexander Road; 16:30: Adelaide Gimnasium t. Woodridge-kollege; 17:30: De Aar t. HTS Port Rex; 18:30: Fichardtpark t. DF Malherbe; 19:30: Swartland t. Otto du Plessis; 20:45: Despatch t. Hangklip.

Comments


Leave a Reply


error: Content is protected !!