Thursday, August 18, 2022
All the latest schoolboy rugby news, results and stats


Gimmies sink Boishaai

By Hannes Nienaber , in News , at 3 August 2014

Francois StemmetDie rugbyspan van Paarl Gimnasium het sy houvas op sy jaarlikse derby sedert 2009 teen die Hoër Jongenskool Paarl gister op Faure-straat, danksy die geleerde skopskoen van sy heelagter Grant Hermanus, behou.

Gimmies het met 16-15 gewen en was deurgaans voor. Boishaai kon laas in 2009 daarin slaag om Gimmies te klop.

Hermanus, wat verlede jaar in die SA Skolespan was, het met al vier sy stelskoppe geslaag. Sy lang lynskoppe het ook ’n reuse-aandeel in sy span se sege gespeel.

Vir Boishaai het sy senter Curtley Grain heelwat geleenthede op die aanval geskep.

Hy het met albei sy span se drieë deur Rayhaan Lombaard en Tristan Solomons die laaste aangee uitgegee.

) Grey PE het die eerste keer sedert 2004 Grey-kollege met die kous oor die kop huis toe gestuur.

Die span van die Baai het op sy tuisveld met 27-20 koning gekraai.

Die spel van veral die heelagter Curwin Bosch, die losskakel Garrick Matteus en die flank Junior Pokomela was deurslaggewend.

Matteus se reuse-skopvoet het die span van die Rosestad op die agtervoet in veral die tweede helfte gehou. Bosch was op die aanval, sowel as met sy skopskoen, ’n doring in die Bloemfonteiners se vlees.

Pokomela het met sy verdediging vrees by sy teenstanders ingeboesem en ook meters ver veld gewen met hardlooprugby. Bosch en Pokomela is albei in vanjaar se SA skolespan ingesluit.

Hoewel Grey-kollege die oorhand in die skrums gehad het, was die tuisspan by die afbreekpunte baas.

) Kroonstad sal vanjaar die rooiste wees wat hy nóg was.

Die Afrikaanse Hoërskool Kroonstad (Rooiskool) het ’n rekord-wegholsege van 52-0 oor die Hoërskool Kroonstad (Blou-skool) in hul jaarlikse wedstryd behaal.

Die Griffons se Cravenweek-kaptein en kantman, Francois Stemmet, het senter gespeel en die meeste van al die spelers met sy spel beïndruk.

Hy het twee keer agter die Blouskool se doellyn gaan kuier.

Die Blouskool het laas in 2007 sy buurman geklop.

Voortrekker se agtsteman Junior Oosthuizen en skrumskakel Phillip Maré het elk ’n driekuns aan drieë in hul span se derby teen Witteberg behaal.

Die Trekkers het die Griffon-liga met dié sege van 57-14 onoorwonne afgesluit.

In die ander derby van die Noord-Vrystaat het Goudveld- Hoërskool, met sy blink senter Carlton Coeries aan die spits, Welkom-Gimnasium met 36-18 verhinder om tot die uitkloprondes van die liga deur te dring.

) Kempton Park, Centurion en Menlopark het met seges oor onderskeidelik Waterkloof (22-20), Florida (25-17) en die Hoërskool Rustenburg (72-12) hul plekke in die kwarteindstryde van die Beeldtrofee vir makroskole bespreek.

Die SA skole-losskakel Tinus de Beer het twee geelkaarte ontvang nadat hy rolmaalbewegings onwettig gestuit het.

Hy is toe van die veld af gejaag, wat sy span waarskynlik die wedstryd gekos het.

Kempton Park het ook ná sy eerste geelkaart ’n strafdrie gekry.

) JG Meiring het in Kaapstad die Hoërskool President se 50ste bestaansjaarvieringe in hul interskole-kragmeting met ’n sege van 27-17 bederf.

) Wilgerivier van Frankfort is die vierde agtereenvolgende jaar as die Oos-Vrystaat se kampioen gekroon nadat hy Vrede met 46-14 verslaan het.

Sy kaptein en agtsteman, Gerrie Muller, het ’n driekuns aan drieë behaal.

Comments


Leave a Reply


error: Content is protected !!