Wednesday, August 10, 2022
All the latest schoolboy rugby news, results and stats


Foto’s wys watter toeskouer blaser klap

By Hannes Nienaber , in News , at 17 August 2015

Die Blou Bulle Rugbyunie (BBRU) het foto’s in sy besit van die bakkie, met die nommerplaat sigbaar, van die toeskouer wat Saterdag die skeidsregter in die Beeld Noordvaal Trofee-halfeindstryd bygedam het.

Die foto’s is deur omstanders geneem. Die skeidsregter, Wilko Esterhuizen, het die wedstryd tussen die Hoërskool Oos-Moot en Helpmekaar-kollege beheer.Esterhuizen het ’n klag van aanranding by die Villieria-polisiekantoor aanhangig gemaak.

Die BBRU kan hom ook verhoor. Oos-Moot kan ook in die moeilikheid wees omdat die gasheer die veiligheid van toeskouers, spelers en alle beamptes tydens wedstryde moet verseker.

Esterhuizen is ná die twee skole se kragmeting van die kleedkamer af agtervolg. Hy sê die toeskouer het hom op sy bors getik terwyl hy in sy motor gesit het en twee keer in die gesig geklap. Esterhuizen het probeer wegkom en ’n Mercedes-Benz-motor agter hom gestamp.

Die toeskouer het toe in sy bakkie geklim en weggery. “Dit was ’n lekker wipplank-wedstryd om te blaas. Ek was maar geskok ná dié voorval, maar ek gaan dit nie net daar laat nie.

“Ek gaan die saak sover vat as wat ek kan,” het Esterhuizen gesê. Die voormalige Springbok-vleuel Pieter Hendriks het Esterhuizen om verskoning gevra vir die toeskouer se gedrag. Hendriks se seun, MP, het vir Helpmekaar op vleuel uitgedraf.

Oos-Moot se span het nadat die eindfluitjie geblaas het ’n tonnel vir Helpies se spelers gevorm uit waardering vir die hewige stryd. Helpmekaar het Oos-Moot met 24-19 geklop en deurgedring tot die eindstryd van die Beeld Noordvaal Trofee vir groot skole.

Die tuisskare het gejubel toe Oos-Moot se heelagter, Tiaan Bedford, met speeltyd so te sê verstreke oor die doellyn val. Esterhuizen was in ’n goeie posisie en het die aangee na Bedford as vorentoe beoordeel. As Bedford se drie toegeken is, sou die doelskop bepaal het wie tot die eindstryd deurdring.

Esterhuizen het glo ’n positiewe verslag vir sy hantering van die wedstryd van die assessor Pieter White ontvang.

Esterhuizen is sedert 2007 ’n skeidsregter. Hy was van 2007 tot 2010 by die Griffons betrokke voordat hy hom in 2011 by die Leeus aangesluit het. Sedert 2012 is hy ’n lid van die Blou Bulle se skeidsregtersvereniging.

Comments


Leave a Reply


error: Content is protected !!