Sunday, July 3, 2022
All the latest schoolboy rugby news, results and stats


Du Plessis maak stem dik op Cravenweek

By Hannes Nienaber , in News , at 8 July 2013 Tags: , , , , , , , , ,

DIE moontlikheid dat die Westelike Provinsie se se binnesenter, Daniël du Plessis in sy pa die voormalige Springbok-senter Michael du Plessis se voetspore sal volg het gister op die eerste dag van die 50ste Cravenweek-toernooi vir hoërskole gestalte gekry.

Du Plessis jr. het gister vier drieë in sy span se oorwinning van 40-24 oor die Pumas gedruk. Buiten sy drieë het hy ‘n indrukwekkende vertoning opgedis. Die rekord vir die meeste drieë in ‘n wedstryd op die toernooi staan agter die naam van JP van der Mescht wat in 1994 vyf keer vir Oostelike Provinsie teen Wes-Transvaal agter die doellyn gaan kuier het.

Die Streeptruie sal waarskynlik teen die Blou Bulle in hulle tweede wedstryd van die week te staan kom.

Boland het met die gasheer die Limpopo Blou Bulle in ‘n vermaaklike hoofwedstryd 31-26 afgereken. Die span se kaptein en agtsteman Hanro Liebenberg en slot Johan du Toit het voorlangs die wa vir die Wynboere deur die drif getrek. 

Die Blou Bulle gaan nie maklik op vanjaar se toernooi gestuit word nie. Die Ligbloues het dit duidelik gestel met hulle oortuigende sege van 46-22 oor KwaZulu-Natal op die eerste dag van die toernooi. 

Die Ligbloues se senterpaar, Franco Naudé en Jurie Linde was aan die spits van dié sege. Die twee het drie van hulle span se sewe drieë gedruk. Hulle het amper na willekeur bresse in die verloorspan se verdediging geslaan. Die spanne het met die telling op 17-elk gedraai, maar KwaZulu-Natal kon nie soos die Blou Bulle na ‘n hoër rat in die tweede helfte oorskakel nie. 

Grens se senter Somila Jho het met sy vertoning in sy span se sege van 38-20 oor Namibië die tendens dat die eerste dag aan die senters behoort aan die gang gesit. Sy sentermaar, Simon Bolze het self ‘n skaflike vertoning gelewer. 

Griekwas se se hoop om sy eerste wedstryd met ‘n sege af te skop, het soos die mis voor die son verdwyn.

Die Poubloues het in die openingswedstryd van die dag, waarvan ‘n groot gedeelte in digte mis beslis is, skandes gemaak deur 35-17 teen Zimbabwe die knie te buig. Zimbabwe se heelagter, Brendon Mandivenga was sy span se beste speler met ‘n persoonlike bydrae van 20 punte.

Vandag se bepalings:

09:30: Oostelike Provinsie-platteland t. Luiperds; 11:00: Griekwas-platteland t. Grens-platteland; 12:30: Valke t. Griffons; 14:10: Leeus t. Suidwestelike-Distrikte; 15:30: Oostelike Provinsie t. Vrystaat.

Comments


Leave a Reply


error: Content is protected !!