Sunday, July 3, 2022
All the latest schoolboy rugby news, results and stats


Die lank en kort van die 50ste Cravenweek

By Hannes Nienaber , in News , at 8 July 2013 Tags: , , , , , , , , ,

Kort Groot langerSwaarder as ‘n Springbok-stut, langer as ‘n Springbok-slot. Nee, dit is nie die woorde van ‘n nuwe vers in Juanita du Plessis se Mengelmoeskardoes-liedjie nie.

Die swaarste speler oftewel twee spelers op die 50ste Cravenweek vir hoërskole, Stefan Grundlingh (Suidwestelike Distrikte) en Carl Heydenrich (Boland) laat die skaal op 130 kg kreun. Dit is drie kilogram swaarder as die swaarste Springbok in die mees onlangse span, Coenie Oosthuizen. Grundlingh sak op vaskopstut vir die Volstruisboere, terwyl Heydenrich die Wynboere se plaasvervanger-slot is. Vra jy dié manne wat hulle eet, sê Heydenrich skertsend: “ Vleis, aartappels en rys. Nie groente nie.”

Dit is die eerste keer dat hy aan die Cravenweek deelneem en het dit as ‘n “lekker ervaring” beskryf. Sy span het die Limpopo Blou Bulle in een van die eerste dag se spannendste wedstryde met 31-26 uitgestof.

Die langste speler in Polokwane is die Blou Bulle se slot, RG Snyman wat ‘n allemintige 2.05m lank is. Ook hy is twee sentimeter langer as die langste Bok wat in die mees onlangse toetsreeks in aksie was, Eben Etzebeth. Snyman weeg boonop ook ‘n stewige 113 kg.

Die kortste en ligste speler, Sphamandla Dubase is ná vandag moontlik die heel ligste en kortste speler wat nog ooit sy voete op ‘n veld in dié toernooi gesit het. Dubase, Grens-platteland se flank, weeg slegs 56 kilogram en is ‘n skamele 1.51 m lank. Hy sou op vanjaar se Cravenweek vir laerskole met sy bou as ’n kantman van gemiddelde grootte getel het. Hy is korter as die kortste Springbok ooit, Tommy Gentles, wat slegs 1.60m lank was. Hy is natuurlik ook ligter as die ligste speler Billy Sendin wat ooit die Groen-en-Goud oor die kop getrek het. Sendin het net 60 kg geweeg.

Grens-platteland kom vandag in sy eerste wedstryd van vanjaar se toernooi teen Griekwas-platteland te staan.

Comments


Leave a Reply


error: Content is protected !!