Tuesday, July 5, 2022
All the latest schoolboy rugby news, results and stats


57 punte in twee wedstryde vir Steenkamp

By Hannes Nienaber , in News , at 23 March 2014

LOUWTJIE STEENKAMP het Maandag in Grey-kollege se weghol-sege van 87-0 oor Hoërskool Klerksdorp gewys waartoe hy in staat is. Steenkamp het ‘n 31 van Grey se punte in dié oorwinning aangeteken.

Steenkamp beskik oor ‘n geleerde skopvoet en het sy geleentheid om vir sy skool se eerstespan uit te draf in die voorwedstryd van die Varsitybeker-wedstryd tussen die Shimlas en Madibaz met albei hande aangegryp. Steenkamp wat op losskakel uitgedraf het, speel vir Grey se tweede span die Cherries op heelagter. Grey het egter teen Klerksdorp meeste van sy eerstekeuse spelers ruskans gegee.

Steenkamp het twee keer gaan druk, nege drieë verdoel en ook met ‘n strafdoel geslaag. Steenkamp kan die bal myle ver sool en het verlede jaar ook as losskakel vir Landboudal van Jacobsdal beïndruk.

Grey het in totaal 12 keer agter Klerksdorp se doellyn gaan kuier. Klerksdorp het ‘n taai week agter die rug nadat hy die vorige Saterdag in die Tuks 16-reeks 17-46 teen Monument die knie gebuig het. Hy het Vrydag teen Kemptonpark 22-27 die knie gebuig, voor hy Saterdag op die Afrikaanse Hoërskool Kroonstad se sportdag teen Welkom-Gimnasium 12-6 aan die wenkant was.

Die Cherries het Vrydag teen Duineveld se eerstespan in die eerste helfte die besoekers van Upington met aanvallende spel op die agtervoet gedwing om uiteindelik 46-19 as oorwinnaars van die veld te stap. Die Cherries het met die omdraaislag 39-0 voorgeloop en kon slegs een drie in die tweede helfte aanteken.
Steenkamp was weer verwoestend. Hy het 26 van sy span se punte via twee drieë, vyf doelskoppe en twee strafdoele aangeteken. Janco van Tonder het ‘n driekuns aan drieë teen Velties behaal.

Vir Duineveld het sy Cravenweek-slot, Ryno Karstens twee keer oor die doellyn gebars. Die besoekers het in die tweede helfte hul eie spelpatroon gevolg en met sy sterk voorspelers die Cherries onder druk geplaas.
Karstens en die flank Theunis Visser was voorlangs die ysters vir hulle span.

Puntemakers:

Cherries 46 (39) – Drieë: Janco van Tonder (3), Louwtjie Steenkamp (2), Dawid Snyman. Doelskoppe: Steenkamp (5). Strafdoele: Steenkamp (2). Duineveld 19 (0) – Drieë: Ryno Karstens (2), . Doelskoppe: Coenie Lampbrechts (2).

Grey-kollege 87 (43) – Drieë: Louwtjie Steenkamp (2), Daniël Rust, Marius Kruger, Kassel Rothman, Hardus Nel, Albert Verwey, Mike Andrade, Niell Stannard, Glenn Erickson, Janco van Tonder, Tokkie Kasselman. Doelskoppe: Steenkamp (9), Julian Jordaan (2), Erickson. Strafdoel: Steenkamp. Hoërskool Klerksdorp 0.

Comments


Leave a Reply


error: Content is protected !!