Share

NewsGZachBrielDie Buffels van Ben Vorster sal vandag steeds langtrane huil, maar kan dalk die laaste lag na sy nederlaag van 19-17 teen Frikkie Meyer van Thabazimbi in die eindstryd van Limpopo se Grootskole-liga.

Frikkie Meyer se heelagter, William Thulare, het die Vossies se harte gebreek deur ‘n strafdoel van 55 meter met speeltyd reeds vertreke oor te klits om aan sy span ‘n roemryke sege te besorg.

Frikkie Meyer sal nou teen die Pumas se naaswenner, Ermelo, in ‘n uitspeelwedstryd van die Virsekerbeker te staan kom. Op die wenner van dié stryd wag die volslae gunsteling en verdedigende kampioen, Helpmekaar-kollege.

Frikkie Meyer was laas in 2012 Limpopo-kampioen toe hy ook op dramatiese wyse danksy ‘n strafdoel deur Danie Loots vir Ben Vorster geklop het.

Ben Vorster sal in sy uitspeelwedstryd teen Potchefstroom Gimnasium te staan kom. Potch Gimmies het in die Luiperds se eindstryd met 25-22 teen Lichtenburg in die stof gebyt.

Secunda het Ermelo in die Puma-eindstryd met 41-13 verslaan, terwyl Oos-Moot vir Hoërskool Tuine met 29-12 geklop het om as kampioen van die Blou Bulle gekroon te word.

Wat Secunda se sege nog meer merkwaardig maak is die feit dat sy flank Brandon Potgieter na slegs ‘n paar minute se spel met ‘n rooikaart van die veld gejaag is.

Dr. Malan van Meyerton se plaasvervanger-voorryman, Raymond van der Walt, na ‘n stormlopie vir sy eerste drie van sy hoërskool-loopbaan oorgebars om aan sy span ‘n oorwinning van 22-18 oor Driehoek in die Valke-eindstryd te besorg.

In die uitspeelwedstryde van die Virsekerbeker vir Makroskole het Kempton Park en Marais Viljoen tot die kwarteindronde deurgedring. Kempies het Noordheuwel met 48-8 afgestof met sy skakelpaar, Chris Booysen en Johnic Smith, wat aan die spits van die sege was. Marais Viljoen het met 42-17 ook oor te veel skietgoed vir Florida beskik. Die span se agtsteman, Franco du Plessis, asook die senterpaar, Alewyn (stet) Vorster en Paul Parsons, het uitstaande vertonings opgedis.

HTS Drostdy se Donkies het net te veel skop vir Tygerberg op Trappespark in Worcester gehad. Die Donkies het ondanks drie geelkaarte steeds daarin geslaag om redelik gemaklik met 47-24 as oorwinnaars van die veld gestap.

Die span se skitterende skrumskakel, Romeo Eksteen, het kort na hy van sy geelkaart terug gekeer het sy tweede drie van die wedstryd gedruk. Sy eerste was ‘n breekslag vanuit sy eie kwartgebied in die eerste helfte.

Die wenspan se vleuel Keanu Mong het self twee mooi bewegings afgerond.

Riebeeckstad het vir die eerste keer ooit daarin geslaag om ‘n trofee omhoog te hou. Riebies was ‘n volle 26 jaar gelede laas in ‘n eindstryd betrokke, maar het Saterdag sy soetse oorwinning nog ooit op ‘n rugbyveld behaal deur Hennenman met 36-7 in die eindstryd te verslaan om as kampioen van die Sandveld-liga gekroon te word.

Riebies was laas in 1992 teen Kroonstad Landbou in ‘n eindstryd in aksie. Kroonstad Landbou was destyds met 31-8 in die eindstryd van die Noord-Vrystaatse liga baas. Kroonstad Landbou wat Springbokke soos André Venter, Burger Geldenhuys en Faan Rautenbach het in 1993 saam met Hoërskool Kroonstad gesmelt.

Hoërskool Reitz het sy titel as kampioen van die Oos-Vrystaatse liga behou deur Ficksburg met 24-10 in die eindtryd ore aan te sit.

Die Hoër Jongenskool Paarl is soos verwag behoorlik deur SACS in hulle kragmeting getoets. Boishaai was egter op die ou einde met 37-17 te sterk.

Paarl Gimnasium sal of ‘n nodige sielkundige hupstoot kry of dalk sal sy wegholsege van 103-12 oor Wynberg Boys’ High ‘n negatiewe effek op die span voorbereiding vir Saterdag se grootste interskole-wedstryd ter wêreld teen Boishaai hê.

Gimmies se kaptein en heelagter, Muller du Plessis, het drie van sy span se 15 drieë gedruk. Die span se losskakel, Ruben Scholtz, het 14 daarvan verdoel vir ‘n persoonlike bydrae van 28 punte.

Oakdale Landbou se heelagter, Clyde Lewis, het ook ‘n driekuns aan drieë in sy span se oorwinning van 78-0 oor Langenhoven Gimnasium behaal.

St Andrew’s College van Grahamstad het gewys dat sy seges oor Selborne College en Grey High School nie vloekskote was nie deur Marlow Landbou van Cradock met 37-29 te klop.

Die Afrikaanse Hoër Seunskool het vir Maritzburg College met 40-25 die loef afgesteek. Affies het slegs een afspraak teen Pretoria Boys’ High vir die seisoen oor. Zwartkop het vir ‘n verrassing gesorg deur Menlopark met 23-12 in ‘n vriendskaplike wedstryd te troef.

Al die uitslae: 

OOS-KAAP

St Andrew’s College 37, Marlow Landbou 29; Queen’s College 32, Kingswood College 23; Hudson Park 28, Selborne College 27.

VRYSTAAT/GRIEKWAS

Voortrekker 44, Goudveld-Hoërskool 10; Witteberg 73, HTS Sasolburg 7; AHS Kroonstad 63, HTS Welkom 3; Wilgerivier 35, Hentie Cilliers 19; Riebeeckstad 36, Hennenman 7 (Sandveld-eindstryd); Reitz 24, Ficksburg 10 (Oos-Vrystaat eindstryd); Hoër Landbouskool Hendrik Potgieter 61, Sand du Plessis 8; Sentraal 24, Vryburg 19; Hoërskool Bloemfontein 35, Zastron 7.

NOORDVAAL

Vriendskaplik: Affies 40, Maritzburg College 25; Waterkloof 44, Jeppe 10; Helpmekaar 41, Parktown Boys’ High 12; King Edward VII 38, Pretoria Boys’ High 24; Transvalia 27, Welkom-Gimnasium 22; Zwartkop 23, Menlopark 12.

Makroskole-uitspeelwedstryde: Kempton Park 48, Noordheuwel 8; Marais Viljoen 42, Florida 17.

Blou Bulle Eindstryde – Groot: Oos-Moot 29, Tuine 12. Medium: Die Wilgers 49, Pretoria THS 8. Middel: Cullinan 40, Lyttelton Manor 13. Klein: Curro Roodeplaat 22, Maragon Olympus 12.

Leeus Eindstryde – Groot: Dinamika 25, Linden 23. Medium: Bekker 22, Trinityhouse 12. Middel: Queens High 48, Allen Glen 19.

Limpopo Eindstryde – Groot: Frikkie Meyer 19, Ben Vorster 17. Medium: Hans Strijdom 20, Ben Viljoen 18. Middel: Frans du Toit 41, Eric Louw 8. Klein: Curro Heuwelkruin 20, Stanford Lake College 19.

Luiperds Eindstryde – Groot: Lichtenburg 25, Potchefstroom Gimnasium 22. Middel: Zeerust 18, Schweizer-Reneke 10. Klein: Koster 23, Sannieshof 8.

Pumas Eindstryde – Groot: Secunda 41, Ermelo 13. Medium: Hoogenhout 33, Volksrust 17. Middel: Steelcrest 31, Kriel 26. Klein: Morgenzon Landbou 69, Hendrina 14.

Valke Eindstryde – Groot: Dr. Malan 22, Driehoek 18. Medium: Brandwag (Benoni) 19, Stoffberg 13. Middel: Belvedere 24, Parys 0. Klein: Heilbron 29, Balfour 7.

WES-KAAP

Hoër Jongenskool Paarl 37, SACS 17; Paarl Gimnasium 103, Wynberg Boys’ High 12; Paul Roos Gimnasium 32, Bishops 30; HTS Drostdy 47, Tygerberg 24; Stellenberg 31, Hoërskool Bellville 13; Worcester Gimnasium 31, Durbanville 24; Oakdale Landbou 78, Langenhoven Gimnasium 0; Boland Landbou 29, Rondebosch Boys’ High 14; President 32, Bosmansdam 10; Hugenote 27, Charlie Hofmeyr 7.

You have no rights to post comments