Covid-19 knak skolesport

Written by Hannes Nienaber

Henning_Gericke School of Rugby | Covid-19 knak skolesport - School of RugbyDie skolegemeenskap is dit eens dat die impak op skolesport deur die inperkings vanweë die Covid19-pandemie ‘n reuse uitwerking op die emosionele welstand asook die ontwikkeling van die leerlinge se vaardighede gehad het.

“Skolesport op skoolvlak is die laaste twee jaar geknou,” het Leon Bantjies, skoolhoof van die Hoërskool Garsfontein, gesê.

Dit is veral die wintersportsoorte wat die meeste deur die pandemie beinvloed is. Rugby, hokkie en netbal is waarskynlik die ergste deur die pandemie op skoolvlak geraak.

“Spansporte toets jou psige heeltyd. Dit leer jou om teleurstellinge asook sukses te hanteer. Jy leer om ‘n gemeenskaplike doel as ‘n span na te jaag.

Dit is belangrik vir die ontwikkeling van ‘n gesonde psige en dit is ongelukkig weggevat,” het Dr. Henning Gericke, kliniese sielkundige, gesê.

Daar was die afgelope twee jaar ook minder geleenthede vir sportsterre weens die kansellasie van meeste van die groot toernooie wat die Cravenweek, Wildeklawer, Waterkloof-netbalfees, Wêreld Skolefees en ander provinsiale toernooie insluit.

“Die kinders het swaar gekry. Hulle is van heelwat geleenthede ontneem. Die kompetisie van wedstryde haal die beste uit die kinders en hulle gemoedstoestand is gewis negatief deur die pandemie beinvloed,” het Schalk Reynders, skoolhoof van die Hoërskool Menlopark, gesê.

Heelwat leerlinge het ook tydens die pandemie besluit om nie meer aan sport deel te neem weens die feit dat hul spanne min of geen wedstryde gehad het om te speel nie.

“Skolesport het vêr agteruit gegaan veral by laerskole. By ‘n laerskool speel die buitemuurse aktiwiteite ‘n belangrike rol. Ons kon agterkom dat dissipline ook weens die kinders se frustrasie moeiliker geraak het om te beheer,” het Louis Dekker, skoolhoof van die Laerskool Wierdapark, gesê.

Die skoolhoofde was dit ook eens dat dit dalk twee jaar of langer sal neem om die agterstand uit te wis.

“Dit kan twee jaar of selfs langer neem om die kinders se vaardighede weer te kry waar dit was. Onthou van die kinders wat volgende jaar op o.13-vlak sal deelneem het as o.11’s laas ‘n volle seisoen beleef,” het Dekker gesê.

Die impak op skolesport strek ook wyer as net die deelnemende leerlinge. Daar was sonder twyfel ook ‘n finansiële impak met borge wat onttrek het, hekgelde vir groot interskoles wat nie ingevorder kon word nie, die verskaffers van truie en spyseniering wat verliese gely het asook die feit dat skole steeds hul fasiliteite in stand moes hou sonder dat daar ‘n inkomste daaruit gegenereer kon word.

“Al die betrokkenes moet net weer entoesiasties en passievol oor hul sport raak. Ons het dit gesien met die Olimpiese Spele. Daar was vooraf verwag dat die gehalte van Olimpiese Spele vroeër vanjaar swakker sou wees weens die uitstel daarvan. Tog het die atlete danksy hul entoesiasme om weer deel te neem verskeie wêreldrekords verbeter,” het Gericke gesê.

Daar is in totaal 20 wêreldrekords tydens die Olimpiese Spel in Tokio verbeter. “Die impak van die pandemie op skolesport is nie net negatief nie. Die lus om weer deel te neem kan ‘n omswaai teweegbring dat die agterstand in minder as twee jaar uitgwis word,” het Gericke gesê.

[powr-comments id="b7ca434c_1639935904183"]